№12



ВОЛЬГА БАРОДЗІЧ: ЗАХОЎВАЙЦЕ СЯМЕЙНАЕ ЦЯПЛО

Колькі шлюбаў было зарэгістравана ў 2016 годзе? Колькі нарадзілася дзетак? Якія імёны найчасцей ім давалі? На гэтыя і іншыя лытанні адказала начальнік аддзела ЗАГС Дзятлаўскага райвыканкама Вольга Бародзіч.

— Ці шмат пар у Дзятлаўскім раёне ў 2016 годзе захацелі афіцыйна аформіць свае адносіны?
— Усяго летась пабраліся шлюбам 133 пары, з іх большасць, 102, — у аддзеле ЗАГС Дзятлаўскага райвыканкама. У сельскай мясцовасці найбольш зарэгістраваных актавых запісаў па шлюбах у Жукоўшчынскім, 12, і Казлоўшчынскім, 8, сельвыканкамах.



ПА ЗДАРОЎЕ У КАЗКУ

Нягледзячы на пераменлівае надвор'е і сезон прастуды, выхаванцы дашкольнага цэнтра развіцця дзіцяці №2 горада Дзятлава не здаюцца, не сумуюць, а загартоўваюцца. Нядаўна тут прайшоў чарговы зімовы Дзень здароўя. У госці да дзяцей прыйшлі Карлсан, доктар Айбаліт і Снегавік, якога выхаванцы садка напярэдадні вылепілі на сваім участку. Малеча і дашкольнікі сустракаліся з казачнымі героямі, разам з якімі замацоўвалі правілы здаровага ладу жыцця, адпрацоўвалі іх на практыцы, займаліся фізкультурай і загартоўкай.

На працягу цэлага дня дзяцей чакалі цікавыя тэматычныя заняткі, рухомыя гульні і, вядома, карысныя для здароўя пачастункі — свежая садавіна.



Адкрыты дыялог "Сувязь пакаленняў"

У актавай зале Цэнтра творчасці дзяцей і моладзі горада Дзятлава прайшоў адкрыты дыялог моладзі "Сувязь пакаленняў". Мерапрыемства падрыхтавалі Дзятлаўская раённая арганізацыя ГА "БРСМ" сумесна з раённым саветам ГА "БРПА".

Прыняць удзел у адкрытым дыялогу былі запрошаны навучэнцы гарадскіх школ, старшыня раённага савета ветэранаў Л. Ю. Кашко, відавочца Вялікай Айчыннай вайны А. Ю. Лях, ветэраны камсамольскага і піянерскага руху Г. М. Чура, Л. I. Халопік, а таксама моладзевыя лідары нашага часу — першы сакратар раённага камітэта ГА "БРСМ" Кацярына Хілмончык і старшыня раённага савета ГА "БРПА" Ірына Мішчанка.



ВЁСКА ЖЫВЕ, ПАКУЛЬ ЖЫВЕ ПЕСНЯ

Веска Студзераўшчына — маляўнічы край, багаты на паданні і легенды. Некалі мнагалюдная, з вірлівым жыццём, з добрымі, працавітымі, улюбёнымі ў песню людзьмі. У гэтай вёсцы людзі многа працавалі і шмат спявалі. Ішлі на працу — спявалі, ішлі з працы — спявалі, адпачывалі — таксама спявалі. Спявалі і на жніве, і на вячорках, і на святах.

Але гады ішлі, час няўмольна ўносіў у жыццё вёскі свае карэктывы. Цяпер тут жыве сорак дзевяць чалавек, і ў асноўным гэта людзі пажылога ўзросту. Але і цяпер гонарам вёскі з'яўляецца народны фальклорны гурт, які існуе ўжо больш за сорак гадоў. Сёння яго кіраўніком з'яўляецца Аліна Міхайлаўна Мішчук. Гурт быў створаны ў 1975 годзе тагачасным загадчыкам клуба Антонам Фёдаравічам Гузарыкам і налічваў больш за два дзясяткі чалавек. Ужо сорак гадоў спяваюць жанчыны песні, якія чулі ад сваіх матуляў і бабуляў, песні сваёй роднай вёскі.



ЛЮБІМАЙ ШКОЛЕ - 50!

Пад такой назвай у Лявонавіцкім дзіцячым садзе-базавай школе праходзіў вечар-сустрэча школьных сяброў. Па традыцыі ў першую суботу лютага выпускнікі школ прыязджаюць на сустрэчу са сваімі сябрамі і настаўнікамі. Такая традыцыя захоўваецца і ў Лявонавіцкім дзіцячым садзе-базавай школе. А сёлетні вечар-сустрэча быў прысвечаны і 50-гадоваму юбілею ўстановы.

Канцэртную праграму мерапрыемства падрытавалі сектар пазастацыянарнага абслугоўвання насельніцтва і артысты Дзятлаўскага раённага цэнтра культуры і народнай творчасці. Гасцей павіталі вядучыя Наталля Маліноўская і Валерый Макарчык. Яны прапанавалі разам прайсці шлях у палову стагоддзя і ў гонар значных падзеяў мінулага запальваць свечкі як сімвал душэўнай цеплыні, якую пакідаюць добрыя ўспаміны.



КАБ РЭАЛІЗАВАЦЬ МАРЫ ДЗЯЦЕЙ I СПАДЗЯВАННІ БАЦЬКОЎ

20 лютага ў 11 гадзін у гімназіі №1 горада Дзятлава пройдзе Дзень адчыненых дзвярэй. Адміністрацыя і педагагічны калектыў установы запрашаюць у госці бацькоў навучэнцаў 4-10 класаў. Наведвальнікі змогуць пазнаёміцца з педагогамі гімназіі, задаць пытанні адміністрацыі, наведаць выхаваўчыя мерапрыемствы ў рамках шостага школьнага дня, даведацца, як і чаму ў гімназіі вучаць дзяцей.

Напярэдадні мерапрыемства дырзктар гімназіі №1 горада Дзятлава Інэса Іванаўна Гецэвіч звярнулася да бацькоў патэнцыяльных навучэнцаў установы:
— Асобна хачу звярнуцца да бацькоў навучэнцаў 4-х класаў. Вашы дзеці хутка развітаюцца з пачатковай школай. Аб складанасці і значнасці перыяду, звязанага з адаптацыяй пяцікласнікаў да пачатку навучання ў сярэдняй школе, напісана нямала. У сучасных умовах варыятыўнай адукацыі гэта пытанне паўстае асабліва востра.



МАСТАЦТВА РУКАДЗЕЛЛЯ СВЯТЛАНЫ ВІНЦУКЕВІЧ

Святлана Аляксееўна Вінцукевіч працуе настаўнікам у Дварэцкай школе. У 2014 годзе я на заняла другое месца ў рэспубліканскім конкурсе сярод настаўнікаў асноваў бяспекі жыццядзейнасці.

Святлана Аляксееўна — яшчэ і таленавіты чалавек, майстар, які ўмее ствараць прыгажосць і вучыць гэтаму дзяцей. Яны наведваюць гурток "Мастацтва рукадзелля".

Святлана Аляксееўна ў Дварэц прыехала з Любані, адкуль родам. Талент ствараць дэкаратыўную прыгажосць сваімі рукамі яна атрымала ў спадчыну ад сваёй мамы, якая умела ткаць, вышываць, у тым ліку і ў тэхніцы рышэлье.



ДЗЕНЬ ЮНАГА ГЕРОЯ-АНТЫФАШЫСТА

У Лявонавіцкім дзіцячым садзе-базавай школе прайшоў Дзень юнага героя-антыфашыста. Пачалося мерапрыемства з урачыстай лінейкі, у час якой навучэнцам нагадалі гісторыю ўзнікнення гэтага дня.

Піянеры 5-7 класаў прачыталі вершы, прысвечаныя дзецям героям-антыфашыстам, подзвіг якіх упісаны асобнай старонкай у гісторыю Вялікай Айчыннай вайны. Піянеры 8 класа расказалі пра піянераў-герояў, якім пасмяротна было прысвоена званне Героя Савецкага Саюза і чые імёны занесены ў Кнігу гонару Беларускай рэспубліканскай піянерскай арганізацыі. Вучні ўшанавалі памяць юных герояў хвілінай маўчання. Напрыканцы лінейкі піянеры далі абяцанне шанаваць гэтую памяць, імкнуцца быць падобнымі на сваіх равеснікаў-герояў.



ДЗЯТЛАЎСКІЯ ГАЗАВІКІ - ЛЕПШЫЯ Ў ВОБЛАСЦІ

Урачыстае адкрыццё пасля капітальнага рамонту адміністрацыйнага будынка Дзятлаўскага раёна газазабеспячэння дало магчымасць не толькі пабачыць, у якіх умовах сёння працуюць газавікі, але і даведацца, чым падмацаваны вытворчыя поспехі газавай галіны рэгіёна. На пытанні карэспандэнткі адказаў генеральны дырэктар унітарнага рэспубліканскага прадпрыемства "Гроднааблгаз" Яўген Смірноў.

— Яўген Барысавіч, як змянілася структура ўнітарнага прадпрыемства "Гроднааблгаз", што яна сёння сабой уяўляе?
— У мінулым годзе мы правялі аптымізацыю і рэструктурызацыю прадпрыемства. Асноўны напрамак — пазбаўленне ад "іншых" відаў дзейнасці, ад якіх вызваліліся і тарыфы на газ для спажыўцоў. Дзякуючы гэтаму, мы змаглі сканцэнтравацца на дзейнасці эксплуатацыйнай працы: на сёння мы не выконваем работы па праектаванні і будаўніцтве сістэмаў газазабеспячэння. Па вобласці былі аптымізаваны 90 работнікаў, якія, аднак, не засталіся без працы. Яны атрымалі перакваліфікацыю і цяпер выконваюць іншыя эксплуатацыйныя задачы на нашых прадпрыемствах у вобласці і рэспубліцы. Сёння на Гродзеншчыне працуюць пяць арганізацый, якія маюць статус філіялаў. Іх складаюць 13 раёнаў газазабеспячэння, у тым ліку — Дзятлаўскі, які не так даўно ўвайшоў у склад вытворчага ўпраўлення "Слонімгаз". Нягледзячы на тое, што па тэрыторыі прадпрыемства "Гроднааблгаз" самае маленькае ў рэспубліцы, па ўзроўні газіфікацыі мы — першыя.



У СТУДЗЕНІ СПРАЦАВАЛІ АПЕРАТЫЎНА

У Дзятлаўскім аддзеле Дэпартамента аховы МУС Рэспублікі Беларусь на чарговай аператыўнай нарадзе асабовага саставу абмяркоўвалі рабочыя пытанні, таксама начальнік аддзела Дзмітрый Іванавіч Харошка пахваліў лепшых супрацоўнікаў за выніковую работу ў студзені 2016 года.

9 студзеня міліцыянер-кінолаг узвода міліцыі Дзятлаўскага аддзела Дэпартамента аховы сяржант міліцыі Дзмітрый Барысавіч Абрамчык выехаў на месца злачынства разам з аператыўна-следчай групай. У вёсцы Пенчыцы ў мясцовай жыхаркі з незамкнёнага склепа невядомы скраў прадукты харчавання: 6 слоікаў са свіной каўбасой, 2 — з паляндвіцай, 3 — з салам. Знайсці злодзея міліцыянеру-кінолагу ўдалося з дапамогай службовага сабакі Нінзаны. Нінзана змагла ўзяць след і вывела праваахоўнікаў спачатку да хаты, дзе знаходзілася частка скрадзеных прадуктаў, а затым — на дарогу да вёскі Засецце, па якой ішоў злодзей. Беспрацоўны, раней судзімы, без пастаяннага месца жыхарства грамадзянін быў затрыманы. Узбуджана крымінальная справа.